Суди ноҳияи Ҷаббор Расулов 
20 июни соли 2024 Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» дар таҳрири нав имзо гузоштанд.
Қонун «Дар бораи танзими ҷашну маросим дар Ҷумҳурии Тоҷикистон» аз ҷумлаи санадҳои меъёрии ҳуқуқие мебошад, ки дар танзими анъанаю оинҳои мухталифи ҷамъиятӣ, аз ҷумла тӯй, маросими дафн ва дигар чорабиниҳои муҳим бо мақсади пешгирӣ намудани хароҷоти зиёдатӣ ва муташаккилона гузаронидани расму таомул қадами муҳим гардид.
Ёдовар мешавем, ки бо ташаббуси Президенти Ҷумҳурии Тоҷикистон 8 июни соли 2007 Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» қабул гардид. Ин қонун тартиби гузаронидани ҷашну маросимро муайян карда, ба ҳифзи арзишҳои асили фарҳанги миллӣ, пешгирии хурофоту таассуб, баланд бардоштани маънавиёт ва сатҳи иҷтимоию иқтисодии мардуми Тоҷикистон равона гардидааст.
Як бахши муҳими ин қонун ворид кардани муқаррарот вобаста ба коҳиши сарбории молии оилаҳо, ҳамчунин талош барои маҳдуд кардани ҷашну маросими «дабдабанок»-и намоишӣ, ки боиси уҳдадориҳои қарзӣ ва дигар саргардониву сарсониҳо мегардиданд, маҳсуб меёбад.
Ҳар як фарди худогоҳу хештаншиносро месазад, ки ҷиҳати риоя намудани меъёрҳои Қонуни мазкур ва роҳ надодан ба ҳуқуқвайронкуниҳо кушиш намуда, дар самти паст кардани сатҳи камбизоатӣ ва гирифтани пеши роҳи исрофкорӣ дар амалӣ намудани Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» саҳмгузор бошанд.
К.Мавлонзода,
Судяи суди ноҳияи
Ҷаббор Расулов